Чумбылат курыквалне вуйым савен кумалмаш

Чумбылат курык

Ош тӱняште юмынйӱлам тӱрлӧ семын шуктен шогышо калык кокла гыч марий шке кӧргӧ вий-куатше дене поснак ойыртемалтеш: шкенжым пагалыше марий айдеме марий улмыжым жапла да шочшышт-влакланат тидымак туныктен шога, пӱртӱсын вийжылан ӱшана, ойго але куанже годым Шнуй Юмылан пелешта. Шнуй Юмо але Кугурак — тиде пӱртӱс дечын Юмын колтымо айдеме. Тудо марий-влак коклаште  илен, нунылан полшен, осал деч арален шоген, порылан туныктен. Калык Юмын колтымо айдемым лӱм дене ойлен огыл, сандене тачат кумалме годым Курык Кугыза але Полемдрук манын сӧрвален пелешта.

Полемдрук — Поро Лемде Курык Кугыза. Киров кундемысе Чумбылат курыквалне Полемдруклан (Кугураклан) вуйым савен кумалмаш кажне ийын кеҥежым эртаралтеш, тидлан Кечын вийжым ончат. Вет Кече — тиде илыш, Кече ок лий — илыш ок лий. Кече волгыдым, шокшым пуа, Кечылан кӧра уло пӱртӱс ылыж шога. Кечын эн тура жапыште шогымыж годым  (кужыт шот дене ончаш гын, кечын волгыдо жапше эн кужу, а йӱд эн кӱчык) Чумбылат курыквалне марий калыкын Тӱня кумалтышыже эртаралтеш. Тиде жапыште Кече пеш чот кугу виян, садлан кумалтышыш толшо-влакат Кече гаяк кугу вий-куатан лийышт манын ты пагытыште эртарат. Лач тиде жаплан тӱрлӧ кундемлаште илыше марий-влак шошо-кеҥеж кумалтыш-влакым эртарен шуктышаш улыт, а тыште  иктешлыше кумалтыш семын лиеш. Тений, 2019-ше ийыште, Чумбылат курыквалне вуйым савен кумалмаш 23-шо июньышто лийын.

В.Мамаев, Шернур районысо «Марий кумалтыш» общиным вуйлатыше.