Огеш кӱл шудалаш эрталше кечым,
Ит лук арамыш ыштыме пашам.
Ит пече шӱм-чонет йыр кӱртньӧ печым,
Ит пӱтырӧ рончалтше мундырам.
Ит чӱктӧ тулым йӧрышӧ сорталан,
Ит муш кидет чӱчалтше йӱр вӱдеш.
Ит ончыкто торжалыкым йолташлан,
Ит кодо шем кышатым ты мландеш.
Лиеш гын йӧсӧ — шорт, ит вожыл йӱкын,
Перат гын чот — пу киндым тый вашеш.
Туна огеш лий тыйым илыш лӱкӧ,
Ушеш кодат шарнашлан курымеш.
©Вера Гордеева