Мыйын лу илышем лиеш гын…

Мыйын лу илышем лиеш гын,
Пӧлеклем улыжге тылат.
Йӧршын ом сыре, ом шыдешке,
Налат иктыжым веле гынат.

Мыйын лу пиалем лиеш гын,
Пӧлеклем улыжге тылат.
Йӧршын ом сыре, ом шыдешке,
Налат иктыжым веле гынат.

Мыйын лу шӱм-чонем лиеш гын,
Пӧлеклем улыжге тылат.
Йӧршын ом сыре, ом шыдешке,
Налат иктыжым веле гынат.

Мыйын шӱдӧ корнем лиеш гын,
Чылажат тый декет намия.
Йӧршын ом сыре, ом шыдешке,
Ик корнеш садиктак вашлиям.

Но лач икте, лач икте веле
Илышем, пиалем, шӱмем.
Тудымат шӱкалат — лиеш неле,
Итак кодо налде, шӱмбелем.

© Валентин Колумб