«Шанче» — идеологий ӱзгар

марий чодыра

Налына кок саманым:
1. Акрет годсо
2. XXI курымсе

Да йодышым пуэна: могай мемнан мер илышна, акрет годсо але XXI курымсе? Коеш пуйто кокымшо.
Таҥастарена Юроп, Америке да моло прогрессив калык дене.
Ынде вигак ужына: экономике, медицине, туныктыш тошто улыт. У технологиян ӱзгарым йот элла гыч кондена, мемнан нимогай тӱнямбал кӱкшыт уке аман. Могай мемнан пиал индекс лийын кертеш, кунам калык тошто технологиян пашам ыштен ила да тыгай изи пашадарым налеш?
Шоналтена илыш нерген саде тӱнямбал кӱкшыт могыр гыч. Келша сӱрет?…

Уке, кӱлеш тӱняумылымашым вашталташ. Кузе?
«Ушан»-влак тыге кутырат: «Те ончыза кузе мари калык ончыч илен, сар жап годсым ончыза, кузе калык орланен илен, рок гыч киндым кочкын. Сай илыш лийын? Кызыт вет сайрак илена лектеш? Чын?»

Садлан «шанчызе-влак» тоштым веле возгалат. Да тӱрлӧ сар, «раскулачиватлымаш» нерген. Тиде нунын политике: калыкын шинчаончалтышым ончыкылык тӱнямбал кӱкшыт гыч курык вынем могырыш савыраш.

Шанче — тиде чыным кычалме паша. Могай чын? — мемнан мер тӱня акрет годсо, тудым нӧлтыман, айдеме семын илаш шонена гын.

Кузе мемнан тазалыкым, поянлыкым, илыш ӱмырнам нӧлташ? У технологийым илышыш пуртыман. «Шанче» — тиде лӱм веле.

Тӱня сӱрет сайт гыч