Шернур районышто – шыже кумалтыш

шыже кумалтыш

Эн ончыч шыже кумалтышышке Чылдемыр кундемысе Пунчерйымал ден Нурсола ялысе калык 29 –ше сентябрьште лектын. Березин Виталий ден Щучин Яков онапу ончылно Юмылан пелештен шогеныт.

13 –шо октябрьште районышто кум вере кумалтыш – влак эртаралтыч: Лажъялыште да Купсолаште  (Кукнур кундем) – ял кумалтыш, Шокшем кусотышто- мер кумалтыш. Чыла вережат калык кумылын кумалтышышке ушнен. Лажъялыште Кугураклан (Курык кугызалан) Смирнов Василий пелештен шоген, вес тулолмо дене кушыл Юмо – влаклан —  Антропов Игорь. Купсолаште Мамаев Вячеслав ден Алексеев Анатолий кумалтыш радамым шуктен шогеныт, Шокшемыште — Березин Виталий ден Березин Вениамин .   Ош Кугу Юмылан сай киндым шочыктымыжлан,  пакчасаскам лынак пуымыжлан,  суртвольыкым,  сурткайыкым ончаш полшымыжлан,  сурт коргышто чонымо пашам ышташ полшымыжлан  тауштен кумалыныт. Умбакыжат калыкын илышыже улан, пиалан лийже манын, йодыныт.

В.С. Ямбаршев – Шернур районысо «Марий кумалтыш» общинын секретарьже.