Сылнымут огеш лий гын тӱняште,
Мо куан чонемым сылнешта?
Огеш шоч садерыште, пакчаште
Кумыл келыштарыше саска.
Огеш пӧртыл ыле тышке кайыккомбо,
Ший-кандалге йӱдым, южым пӱчкеден.
Куп сереш олтем мо, ылыжтен тулотым?
Шижын чон йӧсемым, каналташ волет?
Уланрак вер-олмым тыланет муам мо?
Сылне сад пакчашке воло чоҥештен.
Шулдырет ден мыйым чаманен ӧндалын,
Суксо пыстылетым пыште оҥышкем.
Ондалем мый шкемым, ош пеледыш лийын,
Ош чома гай чучын, ончыко йӧртем.
Йораҥаш тӱҥалше йоҥылыш чап-вийым
Чон-куат вий дене шолгымла йӧртем.
Сылнымут огеш лий гын тӱняште,
Мо куан чонемым луштара?
Йӧсланем, шортам ма… тыгутлаште
Чон садер ласкалык ден ыра.
