Сылнымут пайрем

26 декабрьыште марий серызе, почеламутчо, прозаик, драматург, кусарыше, да журналист, Марий Эл Республикын Калык писательже Вячеслав Абукаев-Эмгакын 60 ияш юбилейжылан пӧлеклалтше сылнымут пайремым эртарыме. Каласен кодыман, тудо тӱрлӧ жанрыштат устан пашам ыштен. Лачак ӱмыржӧ веле кӱчык лие. Паспортыштыжо «Вячеслав Абукаев-Эмгак Пошкырт кундемысе Мишкан район Токтар ялеш 1959 ийыште 5 январьыште шочын» манын ончыктымо лийын. А тудо шкеж нерген тыге ойлен: «Шочынам мый Куткан курык пареҥге подвал Максым коремысе кӱр чыкыме изи пӱя пеленсе Манюк Любан пошкудо пӧртеш. Мый шкемым Изуремыште шарнаш тӱҥалынам. Мый 1958 ий 26 декабрьыште тул гай йӱштӧ кастене шочын возынам. Тӱня У ийым вашлияш ямдылалтын, садлан икшывым серыкташ вашкен огытыл. 1959 ий 5 январьыште шочшо семын варарак сереныт. Тыге мый 5 январьыште шочшо семын илаш тӱҥалынам.

Пайрем годым Вячеслав Абукаев лӱмеш поро кумылым ончыктышо «Ший памаш» сылнымут фондын увертарыме идалыкаш конкурсшым иктешлыме. «Прозо» номинацийыште – Алевтина Богданова сеҥен. Алевтина кӱшыл образованийым Марий Кугыжаныш университетыште налын, сылнымут деке студент пагытыштыже шӱмаҥын. Кызыт мартен ойлымашыже, йомакше-влак «Ончыко» ден «Кече-Солнышко» журналлаште, Эрвий альманахыште савыкталтыныт. Журналистике дене кылдалтше номинацийыште «Марий Эл» газетын корреспондетше Евгения Ёлкина ден «Кугарня» газетын корреспондентше Вероника Мустаева сеҥышыш лектыныт. Телерадио пашаште Наталья Ямаева палемдалтын. Сеҥыше-влаклан дипломым, премийым кучыктымо.

Вячеслав Абукаевын лӱмгечыже вашеш Санкт-Петербургышто 200 медальым велен лукмо. Тыгай надырым «Ший памаш» сылнымут фондын вуйлатышыже, Россий писатель ушемын йыжыҥъеҥже Краснов Василий Владимирович пыштен. Тиде паша ушнен толжо манын, Марий книга издательствын директоржо, Россий писатель ушемын йыжыҥъеҥже Соловьев Юрий Ильич кугун тыршен. Ятыр жап шонен коштмо сомыл илышыш шыҥдаралтын. Пайрем годым тӱрлӧ ийлаште (2013 ий гыч тӱҥалын, 2018 ий мартен), вич ий коклаште эртаралтше конкурсышто сеҥыше чыла лауреат-шамычлан медальым кучыктымо.

Тыгак Марий Элыште тыршыше эн чолга, тӱрлӧ сферылаште сеҥышыш шушо палыме да пагалыме еҥ-влаклан, нунын коклаште писатель-влакланат медальым пижыктыме.

Поро мутым Марий Эл Республик правительстве председательын икымше алмаштышыже Михаил Зиновьевич Васютин, Марий Эл Республикысе Кугыжаныш погын председательын алмаштышыже Анатолий Николаевич Иванов, тыгак писательын пелашыже, шанчыеҥ Любовь Алексеевна Абукаева да молат ойленыт.

Пайрем кас умбакыже Шкетан лӱмеш драме театрыште шуйнен. Сценыште Вячеслав Абукаевын пьесыж почеш шындыме «Алиса, Анфиса, Аниса» комедий шындалтын.